Trocolibro. Edición abril 2026

Chega unha nova edición do noso xa imprescindible Trocolibro, ese momento do ano no que as estanterías se moven, os libros fan a maleta e as lecturas buscan novo destino. Se tes libros na casa que xa remataron o seu ciclo contigo, este é o seu momento de deixalos renacer noutras mans.

De que vai o Trocolibro?

Trátase dun intercambio de libros pensado para darlle unha segunda vida aos exemplares que xa non les e, ao mesmo tempo, descubrir novas lecturas sen pasar pola caixa da compra. Un plan aberto a público infantil, xuvenil e adulto.

Cando?

Do luns 20 ao sábado 25 de abril, podes achegarte a esa mesa chea de libros que agardan novo fogar e ver se hai algún que che está pedindo marchar contigo.

Como participar?

Durante toda a semana atoparás unha selección de libros dispoñibles para levar. Non é necesario traer un libro para poder coller outro: cada persoa pode levar un exemplar ao día.
Límite: un libro por persoa e día, tanto para doar como para recoller.

Tamén podes participar desta dinámica na Axencia de Lectura da Gándara, no seu horario habitual: de luns a venres de 17:00 a 19:00.