Como xa sabedes, o venres 26 de xullo inaugúrase en París a XXXIII edición dos Xogos Olímpicos. Na biblioteca tamén queremos tomar o relevo do facho olímpico e convidámosvos a consultar unha mostra bibliográfica inspirada nos deportes.

No taboleiro da entrada da biblioteca atoparedes un esquema que, segundo as vosas preferencias deportivas, guiaravos ata determinadas lecturas. As obras desta mostra están dispostas en 6 mesas na planta baixa e clasificadas por categorías deportivas do seguinte xeito:

Natación: Verán azul.

Estamos nunha época do ano na que as condicións meteorolóxicas convídannos a facer vida no exterior e gozar da natureza e da nosa contorna.

Vela: … Fun polo vento e vin polo aire…

Déixate levar polo poder da relaxación, esquece o estrés e procura unha vida tranquila e sosegada. Unha boa maneira de acadar o benestar persoal é non loitar contra os elementos.

Triatlón: Non hai dous sen tres e Pentatlón: Repóker.

Ás veces non é suficiente un só volume para contar unha historia. Nesta mesa atoparás triloxías e pentaloxías que te engaiolarán ata que coñezas o seu desenlace.

Ciclismo: Todo vai rodado.

Se pensas que non podes coa vida, nesta mesa tes lecturas que farán que o vexas todo dende outra perspectiva. Imos a pola etapa de montaña!

Levantamento de peso: Que a forza te acompañe!

Seguindo un proverbio hindú que di: “A marcha máis longa comeza cun paso”, tamén nós animámosvos con estas obras que de seguro precisan un bo calzado para seren rematadas.

Artes marciais: Sen encaixar os golpes.

O instinto de supervivencia e o afán de superación son características inherentes do ser humano. Aquí atoparedes algúns exemplos que non vos deixarán indiferentes.

Tiro con arco: Onde poño o ollo…

Afinar a puntería é fundamental cando pretendemos acadar os nosos obxectivos. De seguro que os/as protagonistas destas novelas negras tamén o fixeron (ou mesmo botáronlle un ollo aos libros que temos nesta mesa).

Equitación: Coidando a Rocinante.

As nosas familias non están compostas soamente por persoas. Estes libros guiaranche en cuestións relacionadas co coñecemento, trato e coidado das nosas mascotas e dos animais que nos rodean.

Deportes de pelota: Agora a pelota está no teu tellado.

Traballar en equipo, sentirse parte da sociedade que nos rodea, compartir responsabilidades… Ata que punto participamos? Implicámonos o suficiente? Temos vontade solidaria?

Atletismo: Correndo tanto como Forrest Gump.

O atletismo é un dos deportes máis tradicionais dos Xogos Olímpicos, e abarca diversas modalidades. Tamén esta é unha mostra bibliográfica multidisciplinar.

Ximnasia rítmica e artística: A arte en todas partes.

A procura da beleza, da estética, da harmonía... Que gusto da topar con obras que reúnen estas características! de seguro que neste espazo atopades máis de unha.

E como desta volta a sede dos Xogos Olímpicos é París, preparamos tamén para consultar e levar en préstamo diferentes materiais nunha selección bibliográfica sobre Francia, a súa cultura, historia e obras destacadas da súa literatura.

Pasade pola biblioteca do 22 de xullo ao 9 de agosto para consultar ou levar en préstamo as lecturas olímpicas!