O sábado 18 de abril ás 11:00 h a biblioteca converterase nun espazo cheo de emocións, cores e descubrimentos coa visita da compañía Lalá Teatro, que presentará o espectáculo para bebés de 6 a 36 meses titulado Estás como unha cabra.

A protagonista desta proposta é a Cabra Chiña, que hoxe está algo rara… que lle pasará? Parece que ten un pequeno lío coas emocións, e entre todas as persoas asistentes axudarémola a recoñecelas e poñelas en orde. Ao longo da sesión, exploraranse sentimentos como a alegría, a tristura ou o medo, e descubriranse tamén aquelas cousas que nos axudan a calmarnos e sentirnos mellor.

Será unha experiencia para gozar en familia e achegar aos e ás bebés ao mundo das emocións desde os primeiros meses de vida.

Para participar:

• Os/as bebés teñen que ter entre 6 e 36 meses e o carné da rede de bibliotecas sen sancións pendentes.
• Será necesario reservar praza a partir do martes 14 de abril ás 16:00 horas, de maneira presencial ou chamando ao 981382173.