Convocatoria para exposición artística

A Biblioteca Municipal de Narón invita aos/ás artistas da contorna a participar na nosa exposición colectiva sobre a igualdade, que se exhibirá durante o mes de abril. Esta iniciativa, encadrada dentro dos actos cos que o Concello de Narón conmemora o 8M, busca promover a reflexión e o debate sobre a igualdade a través da expresión artística, convertendo a biblioteca nun espazo de encontro para a creatividade e o pensamento crítico.

Bases da convocatoria:

• Poderá participar calquera persoa maior de idade, preferiblemente que resida ou desenvolva a súa actividade artística no ámbito local.
• As obras presentadas deberán estar relacionadas coa temática da igualdade en calquera das súa vertentes (xénero, diversidade, oportunidades, dereitos, etc.).
• Admitiranse obras en diferentes disciplinas: pintura, ilustración, fotografía, arte dixital e outras manifestacións plásticas en dúas dimensións, sempre e cando as obras sexan susceptibles de seren expostas penduradas.
• Ningunha das dimensións das obras poderá exceder os 70 centímetros.
• O peso máximo total (incluindo o enmarcado ou soporte) das obras será de 1 quilogramo.
• Cada artista poderá presentar ata un máximo de 3 obras.
• As obras deberán ser orixinais e estar debidamente enmarcadas para a súa exposición.
• A selección das pezas correrá a cargo dun xurado especializado en igualdade, que valorará a calidade técnica, a orixinalidade e a coherencia coa temática proposta.

Prazo e forma de presentación:

O prazo de presentación das propostas estará aberto do luns 3 ao domingo 23 de marzo de 2025.

Para participar, as persoas interesadas deberán enviar un correo electrónico a a.gonzalez@naron.gal indicando no asunto “Mostra artística igualdade” e facendo constar:

• Nome e apelidos do/a artista.
• Título de cada unha das obras presentadas.
• Dimensións e peso de cada unha das obras presentadas.
• Teléfono de contacto.
• Fotografías da/s obra/s propostas (en boa resolución).
• Descrición breve de cada obra (título, técnica empregada e reflexión sobre a súa relación coa igualdade), cun máximo de 150 palabras.

Selección das obras:

O xurado especializado en igualdade reunirase o xoves 27 de marzo para facer a selección das obras que formarán parte da mostra.

Notificación:

As persoas seleccionadas serán notificadas por correo electrónico o venres 28 de marzo para a entrega e montaxe das súas obras na biblioteca. O traslado das obras será responsabilidade do/a artista.

O prazo de entrega das obras na biblioteca estará aberto dende o momento da notificación ata o luns 31 de marzo. A entrega das obras poderá facerse no horario de apertura habitual da biblioteca, que é:

• Luns a venres de 9:30 a 13:30 e de 16:00 a 21:00.
• Sábados de 10:00 a 13:00.

A organización reservarase o dereito de retirar as obras que polas súas características ou calquera circunstancia non prevista non poidan ser expostas.

Datas de exhibición da mostra:

As obras seleccionadas serán expostas na sala multiusos da biblioteca municipal do martes 1 ao mércores 30 de abril de 2025 no horario de apertura habitual desta sala:

• Luns a venres de 17:00 a 20:00.
• Sábados de 10:00 a 13:00.

Convidámosvos a compartir a vosa visión sobre a igualdade a través da arte e a formar parte desta iniciativa que busca inspirar e sensibilizar a toda a comunidade.

Para máis información, podedes contactar connosco no teléfono 981382173.

Esperamos as vosas propostas!