Que foi primeiro, os ríos ou o mar? Habería mar de non haber ríos? É posible bañarse dúas veces na mesma auga do mesmo río? Sendo Galicia a terra dos mil ríos estas preguntas teñen máis importancia que a do ovo e a galiña.

Se o traemos ás nosas letras viriamos a descubrir que o río sería Rosalía de Castro e o mar a nosa literatura. Foi ela quen, coma o Miño, atravesou a nosa cultura e o noso país de arriba a abaixo abrindo unha conca chea de afluentes, mananciais, fontes e regatos… que somos nós, que bebemos das súas augas.

No espectáculo que temos programado para o sábado 22 de febreiro ás 11:00 Caxoto Contacontos fai un percorrido pola obra e vida de Rosalía de Castro a través dos seus escritos e do seu testemuño, pero tamén a partir dos afluentes, lagoas ou mananciais que xurdiron dela. Coñeceremos as mulleres poetas que a partir da súa herdanza deron lugar a unha poesía galega recoñecida aquí e fóra das nosas fronteiras.

Para participar nesta actividade:

• Os nenos e nenas teñen que ter o seis anos cumpridos e o carné da rede de bibliotecas sen sancións pendentes.
• É necesario reservar praza a partir do martes 18 de febreiro ás 16:00 horas, de maneira presencial ou chamando ao 981382173 en horario de apertura.