O mércores 29 de novembro ás 18:30 a sala multiusos da planta soto da biblioteca recibirá ao escritor Juan Galán, que ven presentar o seu libro Las tribulaciones de Bruno Lamas. Galán naceu na Coruña en 1961 e reside actualmente na vila de Ares. Comezou a súa carreira literaria coa publicación en 2021 da novela histórica Romanza de los naranjos en flor (Editorial Letrame), unha novela ben documentada que trata sobre os campos de concentración e a represión dos republicanos en Galicia durante a Guerra Civil. En 2022 publicou El eco de tu voz (Editorial Medulia), obra que presentou na nosa biblioteca.

Nesta ocasión Juan Galán preséntanos unha novela protagonizada por Bruno Lamas, un antiheroe machista e mentiroso que por azar acaba sendo confidente da Brigada Político Social, a policía do réxime franquista.

No acto de presentación do libro e posterior tertulia Juan Galán estará acompañado da escritora naronesa María Isabel Ramos Breijo.

As persoas que así o desexen poderán adquirir un exemplar da obra ao finalizar o acto.