Préstamos sorpresa 2022

Tras o éxito dos pasados anos ofrecemos en 2022 a novena edición dos Préstamos de lotes sorpresa durante o Nadal.

Que é?

Trátase dunha actividade para nenos e nenas aventureiros/as aos que non lles asusten os novos retos.

Na biblioteca temos preparados distintos lotes con documentos (libros, CDs, DVDs…) especialmente seleccionados pola súa calidade estética ou literaria. Os lotes están clasificados por idades, aínda que xa sabedes que o da idade é máis ben orientativo.

En que consiste a actividade?

Cada vez que un neno ou nena veña á biblioteca para levar libros á casa poderá elexir a cegas un número de lote do que descoñece o contido. O reto é que non abra o paquete ata chegar á casa. Dentro atopará unha serie de contos, libros didácticos, películas, músicas… (o contido varía en cada lote) seleccionados polo persoal da biblioteca.

Xa sabemos que nalgúns casos pode que o que seleccionamos non coincida moito cos seus gustos, pero sempre pode facer un pequeno esforzo para abrir a mente a novas experiencias e temáticas que ao mellor ata o de agora nunca explorou.

Que lle pedimos a cambio?

• O compromiso de non abrir o paquete ata chagar á casa.
• O esforzo de botarlle un ollo a todos os materiais aínda que pense que non lle van gustar.
• Que nos escriba unha nota e indique nela se os materiais que seleccionamos lle gustaron ou non. Sen medo! Aceptamos todo tipo de críticas!

Participas?

Esperámoste na biblioteca dende o xoves 22 de decembro ata o xoves 5 de xaneiro no noso horario de apertura habitual.

A Axencia de lectura municipal da Gándara participa unha mez máis desta iniciativa, polo que podedes levar lotes sorpresa en préstamo nas mesmas datas no seu horario (luns a venres de 17:00 a 19:00 horas).