Abril, mes de bookcrossing

Hoxe presentámosvos outra das actividades coas que estamos a celebrar o Día internacional do libro infantil e xuvenil e o Día internacional do libro.

Trátase de varias xornadas de bookcrossing que se espallarán durante todo o mes de abril.

Que é o bookcrossing?

O bookcrossing é unha actividade que consiste en liberar libros en espazos públicos para que sexan atopados por outras persoas que, á súa vez, os deixen libres despois de lelos. Podemos facer un seguimento dos nosos libros liberados, que nalgunhas ocasións poden chegar a dar a volta ao mundo.

Que faremos na biblioteca?

Temos seleccionados cincuenta libros (para bebés, infantís, xuvenís e de adultos/as) para liberar en espazos públicos do noso concello.

Cada martes e xoves de abril liberaremos seis libros en tres espazos diferentes e publicaremos en www.bookcrossing.es as notas de liberación para que saibades onde tedes que ir buscalos.

Que tedes que facer vos?

Estade moi atentos/as cada martes e xoves para saber que libros podedes atopar en cada espazo.

Cando atopedes un dos libros liberados, correde a publicar o achado na páxina web e, despois de lelo, deixade que siga a súa viaxe.

Aquí tedes un enlace a un artigo que explica moi ben en que consiste o bookcrossing e que é o que se espera das persoas que participan neste gran club mundial.

Se precisades axuda para inscribirvos ou facer calquera xestión non dubidedes en pasarvos pola biblioteca. Estaremos encantadas de axudarvos.