A construción do xénero e os réximes de propiedade: un relato alternativo.

Este venres 25 de novembro conmemoramos o Día Internacional contra a violencia de xénero cun faladoiro que leva por título A construción do xénero e os réximes de propiedade: un relato alternativo.

"Explicáronnos a historia como unha secuencia de feitos naturais, case biolóxicos, dos que indefectiblemente se deriva unha orde social, un estado de cousas. Así, o patriarcado pareceu ser algo necesario e non continxente. Dalgún xeito, desas premisas infírese que combatelo pode achegarnos a un estado máis civilizado mais que tamén pode implicar ir contra natura. Con todo, non só ese relato que nos presentaron como verdade única, tamén os propios conceptos empregados, son meras proxeccións do paradigma actual. A partir da análise do xénero como función subalterna e da súa relación coa existencia e xestión da propiedade, nesta conferencia proponse unha revisión e un axuste dese mito".

O faladoiro correrá a cargo de Rebeca Baceiredo.

Rebeca Baceiredo (Ourense, 1979) é licenciada en Ciencias da Comunicación e doutora en Filosofía coa tese Achegas onto-éticas para a liberación do suxeito. Unha aproximación a partir da filosofía de Gilles Deleuze, obra coa que acadou o Premio extraordinario de doutoramento. Foi galardoada ademáis co Premio Ramón Piñero de Ensaio 2005 por O suxeito posmoderno. Entre a estética e o consumo, e co Premio AELG ao mellor ensaio por A revolución non vai ser televisada.

Esta actividade desenvolverase o venres 25 de 19:00 a 20:00 horas na sala de conferencias da segunda planta e é totalmente libre (ata completar aforo) e de balde.