Presentación do libro "Poesía para el camino"

A biblioteca organiza novamente un evento literario o venres 22 de marzo ás 18:30. Trátase da presentación do libro Poesía para el camino, primeiro poemario de Gabriela Berini, veciña de Narón.

Gabriela Berini é tradutora e correctora de textos, mais tamén incursiona na escrita de relatos, novelas de ficción e poesía. Naceu en Ferrol a finais dos oitenta, é veciña de Narón e decidiuse a publicar algunhas das súas poesías máis persoais que ela mesma define coma froito da catarse do seu proceso de terapia psicolóxica.

Poesía para el camino, publicado por Editorial Talón de Aquiles en maio de 2023, descríbese como a folla de ruta dun traxecto que aínda non rematou, intentando atopar nas palabras un compás que dera sentido aos camiños da vida, que non son o que se espera deles, senón o que cada quen precisa.

A presentación do libro contará coa presenza da ferrolá Blanca Rodríguez, tradutora literaria con máis de 20 anos de experienciae autora de literatura infantil e xénero fantástico. Rodríguez é ademais coordinadora dos clubes de lectura da nosa biblioteca, o que engade un toque máis especial a este evento.

O acto está aberto a toda a cidadanía ata completar o aforo dispoñible da sala. As persoas asistentes terán a oportunidade de sumerxirse no mundo íntimo das palabras de Gabriela Berini e, se así o desexan, de adquirir un exemplar da obra ao finalizar o acto.